Open Office.org Shqip

Paketa softuerike për punë në zyrë apo privat OpenOffice.org sapo është publikuar edhe për përdoruesit shqiptarë. Kjo paketë përmban program për përpunim te teksteve, tabellave dhe bazave të të dhënave, si dhe program për vizatime dhe shënime të formulave matematikore.

Dje sapo u mbarua me sukses prezantimi i parë në Kosovë për një pako
produktesh me kod burimor të hapur. Fjala bëhet për OpenOffice.org
(OOo) i cili tanimë është përkthyer dhe përshtatur në gjuhën Shqipe si
rezultat i punës intensive të pjesëtarëve të kompanisë Kosovare me seli
në Gjakovë: Ati-Kos.

Pakoja OOo paraqet një përmbledhje programesh të ndryshme si OOo
Writer—program për përpunim teksti, OOo Calc—program për përpunim
tabelash kalkulese, OOo Impress—program për prezantime, OOo
Draw—program për vizatime, si dhe OOo Base i cili është program për
baza të shënimeve.




Kontribuuesi primar për kodin burimor të pakos OOo është kompania e
mirënjohur Sun Microsystems, mirëpo kjo pako është kompletuar dhe
vazhdon të ndërtohet edhe me punën e programorëve të ndryshëm që
gjenden kudo në botë. Participimi i vazhdueshëm si dhe mundësia për
participim në zhvillimin e OOo pakos, është si rezultat i natyrës të
kodit të hapur që e posedon. Sa i përket prezantimit të ditës së
djeshme, ai filloi në orën 11:00 dhe zgjati për rreth një orë në një
nga sallat të Hotelit Grand në Prishtinë. I tërë projekti i përkthimit
dhe përshtatjes të OOo në gjuhën Shqipe u prezantua nga Fatos Stavileci
dhe Shkumbin Saneja.




Fatos Stavileci gjatë prezantimit hyrës.

Pjesa e parë e këtij prezantimi u përqendrua kryesisht në efikasitetin
e këtij produktit, kursimet që ai i ofron, qëllimet pas projektit, si
dhe një numër të çështjeve tjera relevante. Për shkak se OOo në kohën e
fundit arriti të sipërfaqësoj në Microsoft Windows platformë, kjo
paraqiti një kohë ideale edhe për sipërfaqësimin e OOo në gjuhën
Shqipe. Stavileci gjatë prezantimit elaboroi mjaft në çështjen e
kursimit. Ai deklaroi që OOo për shkak të natyrës të kodit burimor të
hapur, në disa raste, sikur ai në Institucionet e shtetit të New York,
Sh.B.A. ofron kursime prej mbi 5 milion dollarësh. Stavileci poashtu
theksoi mjaftë edhe çështjen e licencimit. Sikurse gjithçka që është
duke ndërruar me kalimin e kohës, ashtu edhe çështja e licencave do të
ndërroj në Kosovë. Kur të vij kjo kohë do të ndjehet në një rreth të
gjerë institucional si dhe individual fuqia e pakos OOo.




Fatos Stavileci gjatë prezantimit.

Nga anketa që kishte bërë stafi i Ati-Kos-it në pesë kuvende komunale
të Kosovës në muajin Maj të këtij viti, rreth 98.6% dëshironin pako
softuerike në gjuhën Shqipe. Në një anketë tjetër, pjesa dërmuese e të
anketuarve besonte që një pako softuerike sikur OOo do të ndikonte
shumë në rritjen e produktivitetit në fusha të ndryshme për shkak të
interfejsit në gjuhën Shqipe.




Rezultatet nga anketa në kuvendet komunale.

Gjatë këtij prezantimi Stavileci poashtu theksoi që natyra e kodit
burimor të hapur që posedon OOo në gjuhë Shqipe, përveç që do të
shkaktoje kursime fillimisht për shkak të licencimit, kjo veti do të
ndikoj edhe në kursime të ardhshme për krijimin e programeve shtesë.
Pra, në vend se të blehën një seri programesh nga burime të ndryshme,
programorët vendas do ta kenë mundësinë të krijojnë vetvetiu programet
shtesë dhe ti integrojnë ato me pakon ekzistuese të OOo. Pjesa e parë e
prezantimit poashtu përfshiu informata mbi historinë e këtij projekti,
si dhe suksesin e tij. Projekti për përkthimin dhe përshtatjen e OOo
pakos filloi që nga Dhjetori i vitit 2003. Fillimisht ky projekt filloi
punën me versionin 1.1 të OOo ndërsa tanimë është përfunduar puna në
2.0 Beta shpërndarjen e OOo që paraqet versionin e fundit. Në Tetor të
këtij viti pritet që të lëshohet në përdorim versioni 2.0 stabil i OOo
pakos në gjuhën Shqipe. Puna e pjesëtarëve të Ati-Kos-it ende vazhdon,
dhe gjithmonë kanë hapësirë për të interesuarit që munden të
kontribuojnë në këtë projekt. Pjesa e dytë e këtij prezantimi u udhëheq
nga Shkumbin Saneja i cili kryesisht u përqendrua në demonstrimin e
programeve të ndryshme të pakos OOo në gjuhën Shqipe.




Shkumbin Saneja gjatë prezantimit.

Saneja arriti me sukses ta demonstroi kompatibilitetin e OOo pakos me
atë të Microsoft Office, duke shfrytëzuar programet OOo Writer dhe OOo
Calc. Ai poashtu deklaroi që të gjitha programet që gjendet në OOo
pakon janë në disa raste pothuajse identike sa i përket
funksionalitetit dhe interfejsit me ato të Microsoft Office.




Demonstrimi i aftësive të OOo Calc.


Demonstrimi i aftësive të OOo Impress.

Saneja argumentoi që transferimi nga Microsoft Office pakoja në atë të
OOo nuk do të paraqiste asnjë vështirësi, ku kjo do të jetë një kursim
i madh në aspekt të trajnimeve gjatë implementimit në masë. Sa i përket
promovimit të kësaj pakoje, Ati-Kos shfrytëzoji prezantimin për
shpërndarjen e CD-ve falas të cilat përmbanin skedat e nevojshme për instalimin e pakos si në Windows sistemet poashtu edhe në GNU/Linux.


Tryeza me CD-të instaluese të OOo pakos.

Mirëpo, u theksua që OOo poashtu mundet të shkarkohet edha nga
Interneti, duke i përdorë hiperlidhjet që gjenden në fund të këtij
artikulli. Duke e marrë parasysh numrin e pjesëmarrësve në këtë
prezantim, mundemi të themi që Kosova e ka një treg të njomë të
inxhinieringut softuerik, që dalë ngadalë është duke lulëzuar.



OpenOffice.org Shqip:

http://sq.openoffice.org

Ati-Kos:
http://www.ati-kos.com


GenIus.